“Mae gennym le i fwy nag un plentyn yn ein cartref a’n calonnau!”

Y broses fabwysiadu

Profodd y broses mabwysiadu yn heriol iawn ar adegau, ond doedden ni ddim yn disgwyl iddo fod yn hawdd!  Roedd ambell i ran yn symud yn hwylus ac yn weddol slic, ond wrth gwrs oherwydd natur anodd a sensitif mabwysiadu – cafwyd cyfnodau o oedi yn disgwyl penderfyniadau gan eraill neu yn aros i’r llys fynd drwy’r camau angenrheidiol.  Roedd gennym weithiwr cymdeithasol arbennig, a oedd wedi ein cynghori a mentora drwy gydol y broses.  Roedd yn ein hannog i ystyried beth oedd orau i ni bob amser, ac roedd yna un cyfnod pan bu’n rhaid i ni ystyried os oedden ni’n gallu aros gyda’r “match”.  Fe benderfynom ni ar ôl llawer o drafod ac ystyried, bod y ddau fach gwerth aros amdanynt.

Penderfynu mabwysiadu brawd a chwaer

Roedd y penderfyniad i ystyried mabwysiadu brawd a chwaer yn un hawdd o safbwynt ein dymuniad i gadw brawd a chwaer gyda’i gilydd ac o safbwynt ymarferol, bod gennym le i fwy nag un plentyn yn ein cartref a’n calonnau!  Roedd y sgyrsiau a gawsom gydag ein gweithiwr cymdeithasol hefyd wedi ein cynorthwyo i fod yn ffyddiog yn ein penderfyniad.

Sut oedd pethau pan ddaethant i fyw atom?

Bron i ddwy flynedd yn union wedi i ni gyflwyno’r ffurflen gais mabwysiadu, cyrhaeddodd dau gorwynt bach ein tŷ ni, a’i droi’n gartref swnllyd, hapus a llawn cawdel bendigedig!  Yn amlwg, roedd newid byd llwyr i ni ac iddyn nhw, ac roedd yr wythnosau cyntaf o fod gyda’n gilydd yn flinedig, yn hwyl, yn flinedig, yn heriol ac yn flinedig!  Cafwyd digon o gefnogaeth yn ystod y cyfnod cyflwyniadau a setlo ac fe gadwon ni gysylltiad gyda’r teulu maeth er mwyn cefnogi’r plant a ninnau.  Roedd y plant yn ymdopi gyda theulu, ardal ac iaith newydd ac rydym yn sicr bod y ffaith eu bod gyda’i gilydd o fudd a chymorth enfawr iddyn nhw.  O fewn tri mis roedd y ddau wedi setlo’n dda gyda ni ac yn yr ardal a dod yn blant bach dwyieithog.

Rhwydwaith Cefnogol

Rydym wedi bod yn lwcus i adnabod teuluoedd mabwysiedig eraill yn yr ardal, felly mae hynny wedi rhoi cyfle i ni drafod, holi a chymharu nodiadau bob hyn a hyn, yn enwedig os oes rhywbeth heriol wedi dod ar ein traws.  Bydden ni’n cynghori unrhyw un i wneud defnydd o rwydweithiau cefnogol, anffurfiol neu ffurfiol ac mae ein gweithiwr cymdeithasol wastad wedi bod yno i ni os oedd angen a phe bai unrhyw fater anodd yn codi yn y dyfodol, gwn bod gennym gefnogaeth.

Stori bywyd

Pob hyn a hyn mae cwestiynau yn codi gan y plant am eu gorffennol, weithiau mae’r cwestiwn yn codi’n annisgwyl a rhaid ymateb yn ystwyth a chadarnhaol.  Rydym yn atgyfnerthu negeseuon positif ond gonest ac yn defnyddio lluniau ac enwau.  Rydym hefyd wedi creu llun o goeden sy’n dangos y gwreiddiau o dan y pridd, eu tyfiant nhw a’r canghennau teulu a ffrindiau sydd yn eu hamgylchynu ac yn tyfu nawr.

O’r diwrnod cyntaf hyd heddiw, fydden ni ddim yn newid dim am y ddau gorwynt, ein teulu ni!

---

Os ydych chi’n meddwl y gallech chi roi cartref cariadus i grŵp brodyr a chwiorydd, yna byddem wrth ein bodd yn clywed gennych. Cysylltwch â ni i ddarganfod mwy o wybodaeth am y broses.

Or you can contact us directly:

Os ydych yn byw yn ein rhanbarth Gorllewin Cymru (Sir Gaerfyrddin, Ceredigion neu Sir Benfro)	Os ydych yn byw yn ein rhanbarth Canolbarth Cymru (Powys)
Ffoniwch: 0300 30 32 505 e-bost: ymholiadaumabwysiadu@sirgar.gov.uk	Ffoniwch: 01597 826052 e-bost: adoption@powys.gov.uk

Gall dychwelyd i’r ysgol ar ôl gwyliau’r Nadolig fod yn arbennig o heriol i blant sydd wedi’u mabwysiadu. Mae llawer o blant yn pryderu am adael eu rhieni ac yn cynhyrfu wrth feddwl am y posibilrwydd o wahanu, fel mynd i’r ysgol. Gall yr ymddygiad hwn ddechrau yn dilyn unrhyw newid, fel dechrau ysgol newydd, symud tŷ, neu brofi colled neu brofedigaeth.

8 awgrym i helpu eich plentyn i addasu:

1. Sbardunau Gweledol: Mae cynllunwyr gweledol a thagiau cyfathrebu (fel TomTag) yn wych oherwydd eu bod yn gwneud gweithgareddau dyddiol yn fwy rhagweladwy, gan leihau gorbryder a helpu plant i ddeall beth sy’n dod nesaf.
2. Trafodaethau am bryderon: Dewiswch adegau i siarad am bryderon ac osgoi eu trafod ar adegau eraill.
3. Canmol Annibyniaeth: Rhowch ganmoliaeth am ymdopi heb sicrwydd, hyd yn oed os yw hynny am gyfnodau byr iawn. Er enghraifft, gallwch chi ddweud, “Rwyt ti’n gwneud mor dda yn delio â hyn ar dy ben dy hun!” Mae hyn yn annog y plentyn i barhau i reoli ei orbryder yn annibynnol.
4. Trefn Gwahanu Gyson:Ar adegau gwahanu, dylech ymddwyn fel y byddech pe na bai’ch plentyn yn ofidus (e.e. ffarwelio, gwenu a gadael).
5. Osgoi siarad gormod: Dylech osgoi siarad gormod neu ofyn am esboniadau am ymddygiad.
6. Gweithgareddau Synhwyraidd: Ewch ati i gynnwys eich plentyn mewn gweithgareddau synhwyraidd sy’n eu helpu i dawelu a theimlo’n gadarn. Gall hyn gynnwys gweithgareddau fel neidio ar drampolîn, defnyddio blanced drymach, neu chwarae gyda theganau synhwyraidd. Mae yna hefyd lawer o enghreifftiau o sut y gall gweithgareddau synhwyraidd-weithredol helpu – edrychwch ar yr erthygl hon sy’n llawn gwybodaeth neu’r postiad blog hwn.
7. Cyfathrebu â Staff yr Ysgol: Anogwch gyfathrebu’n agored ag athrawon a staff yr ysgol am anghenion y plentyn ac unrhyw strategaethau sy’n gweithio’n dda gartref. Gall hyn helpu i greu amgylchedd cefnogol yn yr ysgol.
8. Ceisiwch Gymorth: Gall delio â phlentyn gorbryderus achosi llawer o straen. Ceisiwch gymorth gan weithwyr proffesiynol, rhieni eraill neu aelodau o’r teulu.

Cofiwch, mae’r mater hwn yn effeithio ar lawer o blant ac mae llawer o rieni yn teimlo’n rhwystredig mewn perthynas ag ef. Peidiwch â theimlo’n euog. Os oes angen rhagor o gymorth arnoch, cysylltwch â ni. Rydym yma i helpu. Mae yna hefyd nifer o sefydliadau defnyddiol sy’n gallu rhoi cymorth i chi:

1. Adoption UK (Cymru): Mae’n cynnig amrywiaeth o wasanaethau cymorth i deuluoedd mabwysiadol, gan gynnwys grwpiau cymunedol lleol ledled Cymru. Maen nhw’n darparu cyngor, cyfeillgarwch ac amrywiol ddigwyddiadau i helpu teuluoedd i gysylltu a chefnogi ei gilydd.
2. Connect Cymru: Gwasanaeth yn benodol ar gyfer plant a phobl ifanc sydd wedi’u mabwysiadu yng Nghymru, a ddatblygwyd gan bobl ifanc sydd wedi’u mabwysiadu. Maen nhw’n cynnig amrywiaeth o raglenni a chymorth sydd wedi’u teilwra i anghenion plant wedi eu mabwysiadu.
3. Niwrowahaniaeth Cymru: Mae’r sefydliad hwn yn cael ei ariannu gan Lywodraeth Cymru, a’i gynnal gan Gymdeithas Llywodraeth Leol Cymru (CLlLC), ac mae’n gweithio mewn partneriaeth ag Iechyd Cyhoeddus Cymru. Mae’r tîm yn gweithio’n agos gyda Llywodraeth Cymru, Arweinwyr Awtistiaeth awdurdodau lleol, byrddau iechyd, rhanddeiliaid allweddol, a grwpiau cynghori.

Gall yr adnoddau hyn roi cymorth a gwybodaeth werthfawr i chi. Os oes angen mwy o argymhellion neu gymorth ychwanegol arnoch, cysylltwch â ni.